Íslenskir ríkisborgarar

Ég keyrði niður Hverfisgötuna á föstudaginn og sá þar mann sem ég kannaðist við. Hann stóð þar hokinn með plastpokann sinn og glápti innum glugga á einhverri skranverslun neðarlega í götunni. Þessi maður fékk íslenskan ríkisborgararétt á leifturhraða snemma á þessu ári, en hann hafði áður borið heimsmeistartitil í skák. Ég mátti því miður ekki vera að því að heilsa upp á þetta átrúnargoð mitt, því ég hafði mælt mér mót við Sigurð Ingason niðrá Grand Rokk, þar sem við reyndum "visku" okkar. Ég hafði lent í aftanákeyrslu og var því allt of seinn í Quizið. Daginn eftir kíkti ég á "Búnaðarbankaskákmótið" KB banka mótið (Criminal-bank of Iceland), niðrí Austurstæti. Þar hitti ég annan íslenskan ríkisborgara, sem líka fékk ríkisborgararétt á ljóshraða, en hann heitir Hendrik Danielsen. Hann er frábær viðbót í íslenskt skáklíf. Góður náungi sem hefur unnið hér gott starf. Reyndar er hann Dani, sem er kannski eini ljóðurinn á ráði hans, en hann getur svo sem ekkert gert að því, þótt hann sé fæddur í Baunalandi. Svo má ekki gleyma því að ekki eru allir Danir slæmir. Samt eru Danir og Frakkar leiðinlegustu þjóðir sem maður fyrir hittir. Henrik er auðvitað undantekningin sem sannnar regluna, enda vill hann vera hérna á okkar ástsæla klaka eins og vinur okkar Bobby Fischer. Svo megum við ekki gleyma henni Lenku Ptácníkóvu, en hún fékk líka ríkisborgararétt á þessu ári, að sjálfsögðu á ljóshraða. Ég fagna henni líka innilega eins og hinum tveim. Reyndar tók fyrrum eiginmaður hennar Helgi Áss lögfræðingur og skákdálkahöfundur í spaðann á mér á mótinu og óskaði mér til hamingju með Víkingatitilinn. Hann hafði rekist á grein mína um mótið í laugardagsblaði Moggans. Reyndar sendi ég greinina á vitlausan stað, því hún átti að vera frétt, en ekki sem aðsend grein. Því kom þetta ansi bjálfalega út að monta sig af eigin árangri. Ég sleppti því alveg að segja Helga að þetta hefði líka verið heimsmeistaramót í greininni. Hvað um það, þá fagna ég öllum góðum skákmönnum sem hérna setjast að, en finnst samt að sanngirni eigi að ríkja um veitingu ríkisborgararéttar. Deng Rúnarsson hefur verið hér í 7. ár, en er nú búin að sækja um ríkisborgararéttinn, enda mátti hún ekki sækja um fyrr, því hún hefur ekki þessi 2300 elo skák stig, sem félagi minn Össur þingmaður notar sem viðmið um ríkisborgarahæfi. Hvað sagði liðið á Hagstofunni. Jú, umsóknin getur tekið uppí 3-6 mánuði. Verið bara róleg, þetta ætti að ganga í gegn sumarið 2006.