Massaður

Maður verður víst ekki massaður á því að fara í fjallgöngu, berjamó, eða tína kartöflur. Tína kartöflur? Já, ég skrapp upp í Skammadal til að ná mér í kartöflur með Faaborgmeistaranum. Kom síðan heim með lopna putta. Þvílíkur kuldi að skella á, enda haustið á næsta leiti. Túristarnir farnir og krakkarnir eru byrjaðir í skóla. Sumarið er því búið og ég ætla að enda það á morgun með því að tína ber, þs skella mér með fjölskylduni í berjamó áður en blessuð berin frjósa í hel (er ég að verða alger kerling?). Þar með er það endanlega ljóst að þetta ár verður ekkert bætingaár. Ég ætla samt að vera með á Fógetamótinu í bekkpressu í september. Þá tek ég bara heiðuslyftu, sem ég hliðargrein við sjálft mótið. Þeir bestu keppa í bekkpressumótinu sjálfu, en hinir gömu lyfta heiðurslyftu. Maður hefur bara ekki tíma í þetta allt saman. Ég ætla að orða þetta öðruvísi. Þar að segja lífið fyrir og eftir Tiger. Fyrir Tiger átti maður nægan frítíma þrátt fyrir 200% vinnu, en eftir Tiger snýst all um litla karlinn. Hann er líka alveg frábær. Litli Tiger er orðinn mjög massaður og öflugur og minnir mig dálítið á Hulk. Hann gjörsamlega brjálast ef hann fær ekki mjólkina sína.

Ég er búinn

Ég er búinn að finna smiðinn, sem ætlar að byrja á sumarhöll minni sem verður einhverstaðar á suðvesturhorninu, en ég veit ekki hvar?! Hann sagðist geta byrjað að smíða undirstöðurnar ekki málið. Þessi maður hefur smíðað fyrir mig áður, því hann henti upp heilum millivegg í Mýrinni í denn. Hann var mikil íþróttastjarna hér áður fyrr, en hann náði einmitt að sigra eina grein á ólympíuleikum í Montreal árið 1976 (minnir að það hefðu verið þeir leikar). Sigrað heila grein? Jú hann vann hástökkið (eða var það langstökkið) í sínum riðli í tugþrautakeppnininni, þar sem sjálfur Daily Thomson var meðal keppenda. Thomson vann síðan tugþrautina. Sem sagt, smiðurinn er sá eini Íslendingurinn sem hefur unnið grein á olympíuleikum, en fékk því miður ekkert gull. Ég er nú reyndar viss um að Jón Arnar hafi unnið nokkra undanriðla í sinni tíð í td 100 metrunum, en ef sagan er góð, þá er hún sönn sagði maðurinn einhverntíman. Svo var ég með heimsmeistarann í kraftlyftingum í pípulagnaviðgerðum í fyrra. Það er því ekkert smá iðnaðargengi sem er í símanúmerbók minni, þegar ég byrja að smíða höllina mína. Draumahúsið mitt er einmitt svona fjallakofi, þar sem maður getur aftengt sig frá öllu áreiti "stórborgarinnar". Mikið djöfull er ég annars orðinn þreyttur á Reykjavík. En hér býr mitt fólk og hér er mín vinna, þannig að hér verð ég að dúsa. Ó, Reýkjavík Ó, Reykjavík þú yndislega borg sungu Vonbrigði hérna um árið.

Dalalíf

Svo gerðist það einn daginn að ég heillaðist af sveitinni, en það gerðist eiginlega bara í vetur, þegar við Faaborg fórum að skoða sumarhús við Meðafellsvatn og Elífsdal. Við höfðum ákveðna lóð í huga en klikkuðum illilega á því og draumalóðin seldist. Draumalóðin var kofaskrífli við vatnið og á leigulóð, en síðan gerðist það í sumar að verð á þessum sumarhúsalóðum þaut upp úr öllu valdi. Núna tel ég að það sé kominn tími til að tryggja sig inn í framtíðina. Í ferðinni til Laugavatns í vikunni vorum við að skoða okkur um með sumarhús í huga. Mjög margt kemur til greina, frá hjólhýsahverfinu við Laugavatn til landaspildu við Ytri Rangá. Jafnvel kemur Meðafellsvatn ennþá til greina, en kofaskríflið má ekki vera meira en í rúmlega klukkutíma fjarlægð frá Reykjavík eða ennþá styttra eins og t.d við Kistufell eða bara Hafravatn. Ég féll líka fyrir Apavatni í ferðinni, en þar eru nokkrír bústaðir, en sennilega yrði erfitt að komast að við vatnið, en helst myndi ég vilja vera á þessu svæði td á Þingvallarsvæðinu, Laugavatni, Grímsnesi osf. Ef einhver veit um eitthvað boðlegt á þessu svæði, þá má hann endilega láta okkur Faaborg vita. Hugmyndin er að stofna félag um bústað, td fjórir einstaklingar eða fjölskyldur. Td eru Vilborg og Vikar í svoleiðis félagi um bústað í Húsafelli og hefur þessi búskapur gengið mjög vel til margra ára. Það má líka benda á að ég er í svoleiðis félagi, því mikill fjöldi ættingja minna er í félagi um húsið hans langafa í Aðalvík. Haldnir eru fundir einusinni til tvisvar á ári, þar sem liðið skiptir á milli sín tímanum og hefur það gengið stórvel í þeim dæmum sem ég þekki þ.s í Aðalvík og Húsafelli. Helst hefði maður viljað eiga þetta einn, en þar sem maður er fátækur ríkistarfsmaður, þá verður þetta sennilega að bíða um hríð. En þetta er samt mjög fyndið, því fyrir nokkrum árum fyrirleit maður svona smáborgara sem fóru hverja helgi útúr bænum til að fara upp í sumarbústað í einhver leiðindi eða hokra yfir grilli og sofa
i blautu tjaldi. Ég vildi hins vegar ekki sjá sveitina. Vildi bara eiga hús á Spáni og hvergi vera annars staðar en í hverfi 101 í Reykjavík. En núna er maður orðinn þessi plebbi sem maður áður fyrirleit. Annars var ferðin til Laugavatns vel heppnuð. Við fengum bústað í gegnum klíku á besta stað. Tiger fílaði sig vel að vanda, en ég fékk líka að skreppa í golf í Miðdal þar rétt hjá. Fór líka í fínar fjallgöngur, veiði og svo auðvitað í heita pottinn. Því miður kíktu fáir í heimsókn (vissu ekki af okkur), en Faaborg kíkti nokkra daga m.a til að skoða sveitirnar, en við keyrðum um alla fyrrnefnda staði m.a í Biskupstungur, Hrepp og Skeið og lengst inn í Rangavallasýslu. Og ég kíkti líka á föstudagskvöldið í sumarhús Guðnýjar næturhjúkku við Úlfljótsvatn þar sem deildin mín var að skemmta sér. Reyndar var sá spotti lengri í myrkrinu en ég hélt, en ég stoppaði þar bara í klukkutíma enda liðið komið á herðablöðin og ég sjálfur bílandi. Núna vill maður semsagt eiga annað heimili við vatn eða fjall. Semsagt eiga tvö lítil hús, annað í Reykjavík og hitt útá landi. (Fyrir utan húsin "mín" í Aðalvík og í Norður Thailandi)

Ferðalagið

Í ferðalagið

tannbusti+tannkrem+sjampó
sundskýla
stuttbuxur
nærbuxur x ?
bolir x ?
gleraugu
sólgleraugu
linsur+vökvi
myndavél+hleðsla
videovél+hleðsla
tölva + hleðsa+dvd
harður diskur (auka)
gsm+hleðslutæki
veski+passi+visakort
innanklæðaveski
handklæði
landakort+ferðabók
skór (td spari, íþrótta eða strand)

gleymi ég einhverju?

Auka (innanlands)

veiðistöng+taska
golfsett
fjallgönguskór
útivistaföt

gleymi ég einhverju?

Vinna

Þetta er auðvitað hörkupúl að flytja, því nú er Cat að flytja sig um yfir á aðra götu. Þá er nauðsynlegt að raða öllu í rétta kassa. Maður þekkir það sjálfur að eiga mikið af allskonar dóti sem safnast hefur upp í gegnum árin. Nú er Magisterinn búinn að slá okkur flestum við því hann er nú kominn í 4. herbergja íbúð með heitkonu sinnu MM, eða Möttu Meiriháttar.

Ísland-Spánn

Það eru heil sjö ár síðan eða í ágúst 1999 sem ég fór í fyrsta skipti (og vonandi ekki það síðasta) á leik á Camp Nou í Barcelona, en þetta var leikur í Super Cup eða meistari meistarana á Spáni. Barcelona vann Valencia 3-2 að mig minnir, en í lokinn fékk Valencia afhent bikarinn því þeir unnu fyrri leikinn og samanlagt. Ég man að ég fór með hollenskum skólafélaga mínum á leikinn því Faaborg hafði takmarkaðan áhuga á þessum smáleik. Við keyptum frekar ódýran miða og lentum því frekar ofarlega í stúkunni, en samt voru þetta ekki ódýrustu miðarnir, því fyrir ofan okkur voru svo brjálaðir stuðningsmenn Valencia. Ég mæli hins vegar með að menn borgi aðeins meira fyrir miðana eða kaupi jafnvel dýrustu miðana, ca 10.000-15.000 (fer eftir stærð leiksins) því flestir koma bara einu sinni á ævinni á þennan völl. Ég man að ég var að segja þessum hollenska félaga mínum frá knattspyrnunni á Íslandi, þegar Kluvert skoraði glæsilegt mark. Að gömlum vana fannst mér eins og ég fengi að sjá endursýningu af markinu, en ég sá það ekki fyrr en mörgum mánuðum seinna á Eurosport. Þetta var stórleikur enda byrjar spænski boltinn vanalega með þessu einvígi. Þetta er sama einvígi og Eiður á að spila á fimtudaginn en þá mætast meistarar Barcelona bikarmeisturunum í Espanol. En hvers vegna lenti vináttulandsleikur Íslands og Spánar tveim dögum áður? Ekki skil ég hvers vegna ekki mátti færa hann til? En ég þekki þetta ekki nógu vel og sennilega má ekki hnika til leikdögum í alþjóðaboltanum. Því verða a.m.k fimm leikmenn sem ekki mæta á völlinn í kvöld, þs fjórir "Spánverjar" og Eiður. En ég skil Eið og Barca vel. Til hvers að sleppa þessum stórleik í Barcelona fyrir vináttuleik, sem á hvort sem er á eftir að skít-tapast. En vonandi fær Eiður að spreyta sig gegn Espanol, því þann leik ætla ég að horfa á, ef allt fer að óskum.
Nei, ég ætla nú samt að vera bjartsýnn og spái jafntefli 1-1 en það kæmi mér ekki áóvart þótt spænska liðið tæki okkur í bakaríið og Fernando Torres skori þrennu.

Tiger

Veröldin snýst núna um Tiger þessa dagana og því gefst nú lítill tími fyrir einhver áhugamál. Allt snýst núna meira og minna um hans þarfir og nær hann að riðla svefntímanum hjá okkur en ég hélt að ég væri öllu vanur í þeim efnum. Núna þarf maður að skipuleggja tíma sinn eftir hans þörfum, því núna þýðir ekkert egóflipp lengur. Í dag hélt hann upp á sex vikna afmælið sitt og viktaðist nákvæmilega 4,5 kg. Miðað við að vera bara 4.5 er hann alveg ótrúlega öflugur, en hann var bara 2.2 kg þegar hann fæddist. Í dag fór hann í Kolaportið og kíkti á Gay-pride. Hann lét sér þó fátt um finnast og svaf af sér GAY"STEMMINGUNA"

Veiði

Ég veiddi lítið krílí í Þingvallarvatni núna á Sunnudaginn, þegar við heimsóttum Dr. Frölich (Svein Inga) og fjölskyldu í sumarhöll hans við Þingvelli. Þetta var víst einhver dvegmurta, en annars á ég eftir að stúdera fiskistofninn við vatnið og á örugglega eftir að veiða stærri fiska en þennan dverg. Sparimeistarinn var líka mættur til Þingvalla, þar sem bróðir hans á bústað í nágrenni við Frölich. Spari er reynar meira fyrir annarskonar veiðimennsku, en það er reyndar önnur saga. Ég átti reyndar von á því að veiða nokkra væna silunga, en annars skiptir aflinn engu máli heldur útiveran og náttúran. Núna er maður farinn að dýrka malarvegi, fámennið, sveitasæluna og allt sem henni fylgir, en áður fyrr voru það skemmtanir og djamm. Bara að komast út úr bænum veitir manni ólýsanlega gleði. Ætli maður endi ekki sem afdalabóndi eins og Gísli á Uppsölum. Ég er reyndar að fá upp í kok á "geðveikinni" í þéttbýlinu. Draumurinn væri auðvitað að flytja til Aðalvíkur á Hornströndum með fjölskylduna, þar sem ekki nokkur hræða býr yfir vetrartímann. Frábær hugmynd.

Ég fer í fríið

Þá er maður loksins kominn í langþráð frí. Eiginlega til áramóta, en vonandi fæ ég að gera eitthvað, td. aukavaktir, svarta vinnu eða eitthvað annað til að drýgja tekjurnar. Svo hefur maður verið að lyfta þrisvar í viku í gymminu og kem því ágætlega undan sumri, þótt ég hafi klikkað illilega á 250 kg í deddi, þá veit maður að bekkurinn er á réttri leið. Í fríinu verður þó stunduð hefbundin gamlingjasport, eins og veiði, fjallgöngur og golf.

Fidel

Fréttir berast nú af því að heilsu félaga Fidel fari hrakandi. Fidel sem hefur ríkt á Cúbu í meira en 40 ár hefur nú látið völdin í hendur bróður sínum tímabundið. Eflaust er hægt að segja margt gott og slæmt um Fidel, en miðað við mannkynssöguna á tuttugustu og tuttugustu og fyrstu öldinni, þá er Fidel ekki verri en hver annar leiðtogi í þessum heimshluta. Sjálfur ólst ég upp við svarthvíta heimsmynd, sem lýsti sér í því að við Íslendingar teldumst til hinna vestrænu ríkja, hinna lýðfrjálsu og fallegu vestulanda, en í austri var einræðisríkið Sovétríkin og leppríki þeirra í Varsjárbandalaginu, plús hin kommaríkin, þar með talin Cúba. Síðan var það þriðji heimurinn, en þau voru hin fátæku lönd heimsins í Afríku og Asíu. En veröldin er ekki svart / hvít, það er næsta víst. Cúba er reyndar það land í rómönsku ameríku, þar sem lífskjör eru einna skárst, glæpir fátíðir, menntunarstig hátt, heilbrigðiskerfi gott og gleði og glaumur ríkir í landinu. Horfið þið bara á nágrannaríkin, td Dómenikanska lýðveldið, Haiti, Mexico, El Salvador osf osf. Hvert einasta þeirra stendur Cúbu langt að baki, þrátt fyrir viðskiptabann Bandaríkjana í fjörtíu ár. Og þrátt fyrir að þetta ríki hafi verið úthrópað sem eitt mesta einræðiríki veraldar, þá er þetta eitt af fáu löndunum í þessum heimshluta þar sem túristar geta um frjálst höfuð strokið. Ekki hefur félagi Fidel farið með stríði á hendur öðrum þjóðum eða drepið saklaus börn í þúsundatali í þágu einhvers málstaðar s.b stríð gegn hryðjuverkum sem Bandaríkjamenn hafa stundað. Tökum annað dæmi. Hvað yrði sagt ef Fidel myndi selja Hugo Chavez (Venezuela) vopn í tonnatali, til að sá hinn sami gæti murkað lífið úr indjánaættbálkum sem væru með uppsteit. Ef Hugo myndi sprengja upp heilu þorpin og drepa hundruði saklausra barna með cúbönskum vopnum og fjárstyrk yrði allt vitlaust í alþjóðasamfélaginu. Ég vona svo sannarlega að félagi Fidel nái sér að fullu og muni leiða cúbönsku þjóðina meðan hann hefur heilsu og kraft.
VIVA FIDEL

1. mánaða

Nong Tiger á afmæli í dag og er mánaðargamall. Í tilefni dagsins fær hann sér örugglega volga mjólk og lætur finna fyrir sér. Hann þyngist nú vel, enda liggur mikið á að verða stór. Tiger er nú orðinn heil fjögur kíló. Alger moli eins og Viddi hefði kallað það.
MYNDIR